(Madda Oduu ABO/MOA/Waxabajjii 10,2009) Madda Oduu Seeminaara koreen hojii geggesitu ABO godina Awuropaa biyya Belgium magaalaa Antwerpentti Caamsaa 23,bara 2009 qopheesse irratti Hayyu Dureen ABO Jaal Daawud Ibsaa argamuun ummata Oromoo biyya Auroppaa irraa seminaara kana hirmaachuuf hedduminaan argameef ibsa dhimmoota qabsoo bilisummaa Oromoo fi adeemsa siyaasa Ethiopia dirqin afaan qawween suphamaa jirattu fi walumaa gala dhimmoota sochii siyaasa gaanfa Africa irratti bal’inaan ibsa keennuu MOA gabaasa. Ibsoota kana irratti hariiroo siyaasaa biyyootiin Auroppaa fi mootummootiin angahoo ABO waliin qabanii fi deemsa sochii ABO biyyoota olla Oromiyaa jiraatan waliin jiru irratti dubbatanii jiru.
Miseensi Shg ABO fi gaafatamaan dhimma hawaasummaa ABO Jaal Dr,Dagafaa Tuuchoo,akkasumas Miseenotiin GS-ABO fi bakka bu’ootiin Auroppaa Jaal Dr,Shugux Galata, Jaal Aster Gammadaa akkasumas miseeni GS gadaa darbee fi buleessi ABO Jaal Dugoomsaa Caalaan argamuun MOA gabaasa.
Seminaara HDn-ABO irratti argaman kana irratti bakka bu’ootiin Kutaalee fi konyaaleen ABO Auroppaa irratti argamuun gabaafama.
Seminaara tahe kana irratti beektotiin Oromoo gama isaaniin haala sochii siyaasaa fi mirga dhala namaa Ethiopia keessaa irratti hirmaattota seminaaraaf ibsa bal’aa keenanii jiru.
Mata-dureelee fi haalota itti aanu irratti beektoti qoodaa fi ibsa seminaara irratti keenanii jiru.
1ffaa. Dhibdee Walabummaa Seeraa Impaayera Itoophiyaa irra itti ibsa kan kenne Jaale Tashaalee Abarraa, abbaa seeraati;
2ffaa. Garaagrummaa mooraa QBO keessatti dhalatan maddaa fi Furmaata isaa irra itti barnoota kan keenan Dr. Alamayyoo Birruu, ogessa Sayinsii Philosophaati;
4ffaa. Gufuulee ABO Mudatanii fi Bu’aa Galma’anii jiran irra itti ibsa kan kenne Jalle Dhugomsaa Dhugasaa, miseensa gumii saba ABO gadaa dabireeti;
5ffaa. Qooda Dubbartootaa QBO fi Tajaajila Hawaasaaf kan jedhu irra itti ibsa kan kennite, Jalle Angatuu Balchaa; fi
6ffaa. Adeemsa hojii waldaa gargaarsa Oromoo (ORA) irra itti Jaalle Lidiyaa Namarraa, miseensa gumii sabaan ibsi kennameera.
Oslo, Norway
Kanuma waliin wal qabatee gabaasaan MOA akka addeessutti, Jaal Daawud Ibsaa Waxabajjii 6,bara 2009 magaalaa guddittii biyya Norway Oslo itti kanneen argaman miseensotaa fi hawaasa Oromoo Norway jiraatuuf ibsa fakkaataa kennaniiru.
Wal-gahichi kutaa lamatti kan qoodame yeroo ta’u kutaa jalqabaa keessatti J/Dawud jijjiirama gaanfa Afrikaatti deemaa jiru adeemsa QBOn wal-qabsiisuun, hariiroo biyyota ollaa waliin qabnu, haala jeequmsaa ABOn bara 2007/2008 keessa darbe fi dhimmoota biroo irrattis ibsa bal’aa kennaniiru. Itti fufuudhaan J/Dawud Oromoon haala fuula-dura isa eeggatuuf daddaftiin of-qopheessuu akka qabu akeekkachisanii kanaafis ciminni jarmayaa murteessaa waan ta’eef miseensotni ABO kana gaariitti hubachuudhaan akka miseensa tokkoottis ta’e akka konyaa, kutaa fi walii-galaatti kan durii calaa daran cimanii akka hojjettan hubachiisaniiru. Ibsa kana booddee gaaffilee fi yaadni garaa garaa mana keessaa dhihaatanii maree bal’aan irratti geggeeffameera.
Kutaa lammaffaan wal-gahii kanaa Jarmayaa ABO Konyaa Oslo irratti kan xiyyeeffatee dha. Sababni isaas Oslon magaalaa guddiittii Noorwee qofa utuu hin taane akka magaalaa guddittii ABO kutaa Iskaandinaaviyaa taatee tajaajilaa waan jirtuuf ciminni ABO konyaa Oslo cimina ABO kutaa kanaaf, dabalees kan walii galaaf murteessaa dha yaada jedhu irraati. Maree kana keessatti laafina qabnu fi jabina qabnu addaan baafannee jabina keenya qabannee itti fufuun laafina keenya immoo jabeeffannee irra aanuun akkaataa itti jaarmiyaan ABO haalota ammaan duraa caalaa daran biyya keessaa fi alatti hojjetu irratti bal’inaan mare gaggeessaniiru. Maree kanaan booda walgahii ibsa ejjetnoo baafachuun xumuramuu MOA Oslo irraa gabaaseera.
